अबोध निशानको के दोष, फुटबल खेलाडी बन्ने सपना यसरी अधुरै रह्यो, दाहसंस्कार बिहीबार

“आमा म एकछिन खेलेर आउँछु है” भन्दै प्रायः फुटबल खेल्न जाने काठमाडौँ महानगरपालिका–३२ काँडाघारी टाउन प्लानिङस्थित चमेली खड्काको ११ वर्षीय छोरा निशान खड्काको फुटबल खेलाडी बन्ने सपना अधूरै बनेको छ ।
स्कूलमा पनि फुटबलमा नै रुचि राख्ने र स्कूलबाट घर आएपछि पनि प्रायः खेल्न जाने बालक निशान शनिबार र बिदाको दिनमा पनि फुटबल खेल्नै दौडन्थे । आइतबार अपराह्न पनि त्यस्तै नै भयो । मृतक निशानका मामा रामकाजी सापकोटाका अनुसार आइतबार पनि स्कूल छुटेर उनी करीब सवा ४ बजे सिधै आमा चमेलीले सञ्चालन गरेको खाजा पसलमा आए ।
किताबको झोला पसलभित्र राख्दै स्कूल पोशाक खोलेर विश्व कपका बेलामा किनेको अर्जेन्टिनाको टिसर्ट लगाएर आमाले दिएको खाजा खाए । त्यसपछि वैदेशिक रोजगारीमा मलेशिया गएका बाबु गणेश खड्काले फोन गर्छु भनेकाले बाबुसँग कुरा गर्न पाइने भो भनेर मख्ख थिए ।
निशान अपहरण भएको दिनमा मात्रै अपहरणकारी सिन्धुपाल्चोक कार्यथलीका २३ वर्षीय अजय तामाङ र नुवाकोट समरीका २४ वर्षीय गोपाल तामाङ तीन पटक पसलमा आएका थिए । घरमा रंग लगाउने काम गर्दै आएका यी दुवैले विगत तीन वर्षदेखि चमेलीकै खाजा पसलमा नियमित खाजा खाने गर्थे ।
उधारो खाजा खाने र कहिलेकाहीँ रकमसमेत सापट्टी चल्ने गरेको अपहरणकारीले चमेलीसँग लिएको ऋणसमेत नतिरी उल्टै छोरा अपहरण गरेर हत्या गरेका छन् । त्यस दिन पनि छोराले कर गरेकाले चमेलीले छोरा निशान र अपहरणकारी गोपाललाई मोबाइल किन्न पठाइन् । निशानकै साइकलमा दुबै गए र एक हजार २०० मा मोबाइल किनेर ल्याएपछि गोपाल आफैँले मोबाइलमा सिम राखिदिए ।
त्यसपछि निशानले आमालाई खेल्न जान्छु है आमा भनेर गयो । “आमासँग खेल्न जान्छु भनेर बिदा लिएको त्यो क्षण उसको अन्तिम बिदाइ बन्नपुग्यो,” मामा सापकोटाले भन्नुभयो । छोरा खेल्न गएको केही क्षणपछि दुवै अपहरणकारी पनि पसलबाट निस्किए । सधैँ साढे ७ बजेसम्म खेलेर घर फर्कने निशान त्यस दिन साढे ८ बजेसम्म पनि नफर्किएपछि आमाले छिमेकीतिर खोजी गर्नुभएको थियो । छिमेकीमा टिभी पो हेर्दै छ कि भनेर सोधीखोजी गर्दै गर्दा करीब ९ बजे चमेलीको नयाँ फोनमा घण्टी बज्यो ।
फोन उठाउने बित्तिकै अपहरणकारीले “तेरो छोरा हाम्रो कब्जामा छ, छोरा चाहिने भए ४० लाख ठीक पार, प्रहरीलाई खबर गरिस् भने ठीक हुन्न” भनेर फोन राखिदिएको चमेली बताउनुहुन्छ । पछि पटक पटक यताबाट फोन गर्दा पनि अपहरणकारीको फोन नउठेको र स्विच अफ छ भनेपछि आत्तिएकी उहाँले छिमेकी र नजिकै रहेको माइतीलाई बोलाउनु भएको थियो ।
बच्चा अपहरण भएको हल्लाखल्ला भएपछि छिमेकीले १०० मा फोन गरिदिएको केही बेरमै काँडाघाडी प्रहरी बिटबाट प्रहरी आयो भने त्यसको केही समयपछि महानगरीय प्रहरी अपराध महाशाखाका टोली आएको थियो । मृतक बालकका मामा भन्नुहुन्छ, “पैसा दिन्छौँ कहाँ भेट्नेसम्म पनि भन्न पाइएन, पछि फोन नै नगरी भाञ्जाको हत्या गरे अपराधीले ।” प्रहरीको विभिन्न टोली बनाएर खोजी कार्यलाई रातभरि तीव्रता दिएको बताउँदै उहाँले आफैँ पनि राति ३ बजेसम्म एउटा टोलीमा बसेर भाञ्जाको खोजी गरेको बताउनुभयो ।
प्रहरीको अनुसन्धानअनुसार खाजाघरमा चमेलीले अपहरणकारीकै अगाडि मलेशियाबाट श्रीमान्ले पैसा पठाइदिएको सुनाउनुभएको थियो । त्यही सुनेर फिरौती माग्न अपहरण गरेको र अपहरणपछि आफूहरु भाडामा बस्दै आएको मध्यपुरथिमि नगरपालिका–७ नगदेश बुद्ध विहारको तल श्याम लवटको घरमा लगेको अपहरणकारीले बताए ।
प्रहरीका अनुसार चिनजानकै व्यक्ति भएकाले अपहरणकारीसँग सजिलै उनीहरुको कोठामा पुगेका निशानकै अगाडि फिरौती रकम मागेपछि निशान कराएर चिच्याएको र पछि अपहरणको पोल खुल्ने डरले हत्या गरेका हुन् । हत्यापछि लवटकै निर्माणाधीन घरको डिपिसीभित्र गाडेर फरार भएको र खोजी गर्ने क्रममा सूर्यविनायक जंगलमा प्रहरीको गोली लागि दुवै अपहरणकारीको मृत्यु भएको थियो ।
दुई छोरी र एक छोरालाई आमाको जिम्मा लगाएर मेलेशिया गएका गणेशले घटनाका बारेमा हिजो राति मात्रै थाहा पाउनुभएको थियो । मलेशियामा सँगै बसेका छिमेकी भाइले घटना हिजो दिउँसै थाहा पाए पनि उनले भने राति मात्रै थाहा पाएपछि मलेशियामै शोकमा डुबेका छन् । गत फागुनमा ४० दिनको बिदा लिएर नेपाल आएका गणेश गत चैत १३ गते मलेशिया फर्किएका हुन् । छोरा सँगको उहाँको अन्तिम भेट १३ गतेका लागि लेखेको रहेछ आफन्त भन्छन् । गणेश मलेशियाबाट आउँदो बिहीबार १ः३० बजेको फ्लाइटमा नेपाल आउने भएका छन् ।
उता स्थायी घर मेलम्ची नगरपालिका–९ दोबाटो रातामाटामा रहेका निशानका हजुरबुबा दुर्गाबहादुर खड्का र आफन्त पनि शोकमा डुबेका छन् । नातिको हत्याको खबरले हिजो दिउँसैदेखि हजुरबुबा निकै पीडामा रहेको र आज मेलम्चीबाट काठमाडाँै आइपुगेका परिवारका सदस्यले बताए । हिजो राति चमेलीलाई माइती घर लगिएको छ । चमेलीले होटल चलाउँदै आएको स्थानभन्दा केही माथि काँडाघारीमै बस्दै आएका माइतीमा पुगेपछि पनि चमेली र माइतीपक्ष शोकले रातभर जागै छन् ।
चमेलीका बुबा मीनप्रसाद सापकोटा आफैँ सम्हालिन सकेका छैनन् । नातिको सपना अधुरै भो भन्दै आफँै रुँदै छोरीलाई सम्झाउने प्रयास गरिरहेका छन् । आज भने शवपरीक्षण गर्नुपर्ने भएपछि परिवारका अधिकांश व्यक्ति र टोल छिमेकका केहि व्यक्ति शिक्षण अस्पताल पुगेका थिए ।
यता कक्षा ६ मा निशान पढ्दै आएको स्कूल हाइल्याण्ड इङलिस स्कूल पनि आज बन्द गरिएको छ । आफ्नो स्कूलको विद्यार्थीको अपहरण गरी हत्या गरेको शोकमा स्कूल बन्द गरिएको प्रधानाध्यापक प्रल्हाद खड्काले बताउनुभयो । स्कूलमा पनि फुटबल खेल्न नै धेरै मन पराउने निशान फुटबल खेलाडी बनेर देशको नाम राख्छु भनेर भन्ने गरेको खनाल सुनाउनुहुन्छ । स्कूलमा कसैलाई नराम्रो व्यवहार नगर्ने, प्रायः सधैँ स्कूल आउने अनुशासित विद्यार्थी भएको बताउँदै निशानको हत्याले सिंगो स्कूल परिवार शोकमा डुबेको उहाँले बताउनुभयो । मृतक निशानका बाबु गणेश आगामी बिहीबार १ः३० बजेको फ्लाइटबाट नेपाल आएपछि बालकको सोहिदिन नै दाहसंस्कार गरिने उनका परिवारले जनाएको छ । – रमेश गिरी

(Visited 1,717 times, 1 visits today)

सम्बन्धित समाचारहरू

सिड्नीमा प्रथम ओसेनिया विज्ञ सम्मेलन आयोजना हुँदै, नेपालको विकास केन्द्रमा (भिडियोसहित)
एक सातापछि अष्ट्रेलिया जान लागेकी युवतीको प्रेमीबाट हत्या !
अष्ट्रेलियाका खडेरीपीडित किसानलाई नेपाली समूदायले सहयोग गर्ने, एनआरएनले लियो अग्रसरता
नेपाल र अष्ट्रेलिया परामर्श बैठक काठमाडौंमा, राजदूतले उठाइन् विद्यार्थीको समस्या
गंगामायाको छोरो नूरप्रसादबारे नयाँ खुलासा, श्रीमती र छोराको विजोग !
आर्थिक संकटमा एनआरएन अष्ट्रेलिया, अघिल्लो नेपाल महोत्सवकै ३५ हजार डलर बजारमा बक्यौता
विद्यार्थीले सातामा २० घण्टाभन्दा बढी काम गरेको भेटेपछि विमानस्थलबाट फिर्ता, भिसा रद्द
अष्ट्रेलियामा खडेरीले सर्पको जोखिम बढायो, सतर्क रहन आग्रह
दोश्रो बन्दै मेलबर्नले गुमायो मष्ट लिभेवल सिटीको ताज, यस पटक भियना एक नम्बरमा !
नेपाली क्रिकेटमा सघाउँदै एक्सपर्ट एजुकेशन, पारस खड्का बने एक्सपर्टको ब्रान्ड एम्बेसडर
English